2 Chronicles 18
UMikhaya Uphrofetha Okubi Ngo-Ahabi
1Ngakho uJehoshafathi wayenothe kakhulu njalo ehlonipheka, waba lobunini lo-Ahabi ngokwendiselana. 2Ngemva kweminyaka ethile waya kwethekelela u-Ahabi eSamariya. U-Ahabi wamhlabela izimvu ezinengi lezinkomo yena kanye labantu ayelabo njalo wamkhuthaza ukuba ahlasele iRamothi-Gileyadi. 3U-Ahabi inkosi yako-Israyeli yabuza uJehoshafathi inkosi yakoJuda wathi: “Uzahamba lami na ukuyahlasela iRamothi Gileyadi?” UJehoshafathi waphendula wathi, “Mina nginjengawe, abantu bami banjengabantu bakho; sizakuba lawe empini.” 4Kodwa uJehoshafathi wasesithi enkosini yako-Israyeli, “Akubuze kuJehova kuqala.” 5Ngakho inkosi yako-Israyeli yasibuthanisa abaphrofethi – amadoda angamakhulu amane – yababuza yathi, “Siphume impi siyehlasela iRamothi Gileyadi, loba ngizithibe na?” Bayiphendula bathi, “Hamba, ngoba uNkulunkulu uzayinikela esandleni sikaJehova.” 6Kodwa uJehoshafathi wabuza wathi, “Kambe kakukho na umphrofethi kaJehova lapha esingabuza kuye na?” 7Inkosi yako-Israyeli yaphendula uJehoshafathi yathi, “Kusasele indoda eyodwa esingabuza ngayo kuJehova, kodwa ngiyayizonda ngoba ayikaze iphrofethe okuhle ngami, iphrofetha okubi kokuphela. InguMikhaya indodana ka-Imla. UJehoshafathi wathi: “Inkosi kayingatsho njalo.” 8Ngakho inkosi yako-Israyeli yabiza esinye sezikhulu zayo yathi kuso, “Ngibizela uMikhaya indodana ka-Imla khathesi.” 9Bembethe izambatho zabo zobukhosi, inkosi yako-Israyeli loJehoshafathi inkosi yakoJuda babehlezi ezihlalweni zabo zobukhosi esizeni sokubhulela amabele ngasemangenelweni esango laseSamariya, labo bonke abaphrofethi bephrofetha phambi kwabo. 10UZedekhiya indodana kaKhenana wakhanda izimpondo ngezinsimbi, wasesithi, “Nanku okutshiwo nguJehova uthi: ‘Ngalezimpondo uzabhuqa ama-Aramu uwabhubhise.’ ” 11Bonke abaphrofethi babevele bephrofetha okufananayo besithi, “Hlasela iRamothi Gileyadi unqobe, ngoba uJehova uyinikile esandleni senkosi.” 12Isigijimi esasithunywe ukuyabiza uMikhaya sathi kuye, “Khangela, wena nguwe wedwa; abanye abaphrofethi bakhulume ngokunqoba kwenkosi. Vumelana labo, lawe ukhulume okuthokozisayo.” 13Kodwa uMikhaya wathi, “Ngeqiniso njengoba uJehova ukhona, engingamtshela khona yilokhu okutshiwo nguJehova.” 14Uthe efika, inkosi yambuza yathi, “Mikhaya, siye empini eRamothi Gileyadi, loba ngizithibe na?” Yena waphendula wathi: “Hlasela unqobe, ngoba bazanikelwa ezandleni zakho.” 15Inkosi yathi kuye, “Kambe kumele ngikufungise kangaki ungangitsheli olunye ulutho ngaphandle kweqiniso ebizweni likaJehova na?” 16Ngakho uMikhaya waphendula wathi, “Ngabona abako-Israyeli bonke behlakazekile emaqaqeni njengezimvu ezingelamelusi, inkosi yathi, ‘Lababantu kabalamkhokheli. Kabazibuyelele emakhaya ngokuthula.” ’ 17Inkosi yako-Israyeli yathi kuJehoshafathi, “Kangikutshelanga yini ukuthi uvele kaphrofethi lutho oluhle ngami kodwa okubi kuphela na?” 18UMikhaya waqhubeka wathi, “Ngakho zwanini ilizwi likaJehova: Ngabona uJehova ehlezi esihlalweni sakhe sobukhosi lebandla lonke lasezulwini limi ngakwesokudla langakwesenxele. 19Njalo uJehova wathi, ‘Ngubani ozakhohlisa u-Ahabi inkosi yako-Israyeli ukuba ahlasele eRamothi Gileyadi njalo ayofela khona na?’ Omunye wabonisa lokhu, omunye laye lokhuyana. 20Ekucineni kwasekuphuma umoya othile, wema phambi kukaJehova wathi: ‘Ngizamkhohlisa mina.’ UJehova wathi kuwo: ‘Ngendlela bani na?’ 21“Wona wathi: ‘Ngizahamba ngiyekuba ngumoya wokuqamba amanga emilonyeni yabo bonke abaphrofethi bakhe.’ “UJehova wathi: ‘Uzaphumelela ukumkhohlisa. Hamba-ke uyekwenza lokho.’ 22“Ngakho-ke uJehova ufake umoya wokuqamba amanga emilonyeni yalaba baphrofethi bakho, ngoba uJehova ukumisele okubi.” 23Ngakho uZedekhiya indodana kaKhenana waphakama wayawakala uMikhaya ngempama ebusweni, watsho embuza wathi, “Umoya kaJehova wasuka njani kimi ukuyakhuluma kuwe na?” 24UMikhaya waphendula wathi, “Wena ngokwakho uzakubona lokho mhla ubalekela endlini engaphakathi usiyacatsha.” 25Inkosi yako-Israyeli yathi, “Bambani uMikhaya, limbuyisele ku-Amoni umbusi wedolobho lakuJowashi indodana yenkosi 26lithi: Nanku okutshiwo yinkosi, ithi: Valelani umuntu lo entolongweni, lingamniki lutho ngaphandle kwesinkwa lamanzi ngize ngiphenduke kukuhle.’ ” 27UMikhaya waqonqosela wathi, “Uma uzakufa waphenduka kukuhle, uJehova uyabe engakhulumanga ngami.” Waseqhubekela phambili wathi, “Liwabambisise amazwi ami, lina bantu lonke!”Ukubulawa Kuka-Ahabi eRamothi Gileyadi
28Ngakho inkosi yako-Israyeli loJehoshafathi inkosi yakoJuda baya eRamothi Gileyadi. 29Inkosi yako-Israyeli yathi kuJehoshafathi, “Ngizahlasela ngingazakali ukuthi yimi, ngizifihlile, kodwa wena gqoka ezakho izigqoko zobukhosi.” Ngakho inkosi yako-Israyeli yalahlisa isimo sayo yadibana empini. 30Ngakho inkosi yase-Aramu yayiqonqosele abalawuli bezinqola zokulwa yathi, “Lingalwi lamuntu, loba ngomncinyane loba ngomkhulu, ngaphandle kwenkosi yako-Israyeli.” 31Abalawuli bezinqola zokulwa bathi bebona uJehoshafathi bathi, “Yiyonale inkosi yako-Israyeli.” Ngakho bamphendukela ukuba bamhlasele, kodwa uJehoshafathi wahlaba umkhosi, uJehova wamsiza. UNkulunkulu wabenza baya khatshana laye, 32ngoba abalawuli bezinqola zokulwa bathi sebebonile ukuthi kasiyo inkosi yako-Israyeli, abazange besaxotshana laye. 33Kodwa omunye watshoka kungananzelelwe umtshoko waphutsha emkhandlwini wesikhali wagwaza inkosi yako-Israyeli. Inkosi yatshela umtshayeli wenqola yokulwa yathi, “Phenduka uye le, ngisusa ekulweni lapha, sengilimele.” 34Impi yalwiwa ilanga lonke, njalo inkosi yako-Israyeli yeyama enqoleni yayo yokulwa ikhangele ama-Aramu kwaze kwaba ntambama. Kuthe litshona layo yabe isifa.
Copyright information for
NdeIBE